Депутаттарыңызды «Нұр Отанның» қабылдауынан іздеңіздер

Облыстық және қалалық мәслихат депутаттарының редакцияға жолдаған ашық хатынан соң (“Жайық самалы”, №30, 28.07.11) бізде бірсыпыра күтпеген жағдайлар туындады. Оқырмандар өздерін мазалаған сұрақтарға жауап алу үшін өз сайлаушыларын қалай табуға болатынын білгісі келіп,  бізге қоңырау шала бастады.

Облыстық мәслихат хатшысы, депутат Жалғас ДҮЙСЕНҒАЛИЕВбос уақыты жоқтығын айтып, кездесуден бас тартты. Сондықтан оған төмендегі сауалдарды жазбаша түрде жолдадық:

1. Облыстық мәслихатта қанша депутат бар?

2. Қандай жұмыс топтары бар және оларды кім басқарады?

3. Сайлаушылар өз округінен сайланған депутатпен қай жерде  кездесе алады?

Ж. Дүйсенғалиевтің қол қойған жауабына сүйенсек, Атырау облыстық мәслихатында 27 округтен сайланған 27 депутат бар. (телефондарымен берілген тізімді төменнен қараңыз) Мәслихатта төрт комиссия тұрақты қызмет атқарады: 1.Тексеру комиссиясы (төрағасы депутат Б.АЙДАШЕВ), 2.Бюджет, қаржы, экономика, кәсіпкерлікті дамыту, аграрлық мәселелер және экология жөніндегі тұрақты комиссия (төрағасы депутат М.ШЫРДАБАЕВ),

3.Халықты әлеуметтік қорғау, денсаулық сақтау, білім беру, мәдениет және жастар ісі бойынша тұрақты комиссия (төрайымы, депутат Ә.БЕКҚОЖИЕВА), 4.Заңдылық, құқық тәртібінің және депутаттық этиканың сақталуы мәселелері жөніндегі тұрақты комиссия (төрағасы, депутат М.АРТЫҒАЛИЕВ).

Жалпы Атырау  облыстық мәслихаты депутаттарының  атқаратын міндеттері «ҚР жергілікті мемлекеттік басқару және өзін-өзі басқару» туралы заңының 6 - бабына сәйкес белгіленген» деп түсінік береді Ж.Дүйсенғалиев. Біз заңнан мынадай тармақ таптық: депутаттардың міндетіне «азаматтардың құқықтары мен заңды мүдделерін қамтамасыз ету өкілеттігі» кіреді. Ж. Дүйсенғалиевтің жауабында айтылғандай, сайлаушылар мәслихат депутаттарымен «Нұр Отан» ХДП облыстық филиалы жанынан өткізіліп отырған қоғамдық бақылау арқылы  кездесуіне болады.  Өкінішке орай, ол қай депутат қай  күндері  қабылдайтынын көрсетпепті.

- Оның бәрін «Нұр Отаннан» біле аласыз. Әр депутаттың сейсенбі сайын жүргізетін өз жұмыс графигі бар. Біз оны білмейміз, бұл «Нұр Отанның» ұйымдастырып отырған шарасы,-дейді хатымызға жауап берген  облыстық мәслихат маманы Ержан ТҮРКІСТАНОВ.

ҚАЛАЛЫҚ МӘСЛИХАТ АҚПАРАТ БЕРМЕЙДІ

Қалалық мәслихатқа қойған сауалдарымызға хатшы Бекболат ҚАЗИМАНОВ қол қойған өте қысқа жауап алдық. «Хатыңызда көрсетілген сұрақтарыңызға жауап жолдау өкілді органның құзіретіне жатпайды». Біз қалалық мәслихат хатшысы атынан тапсырманы орындаған  маман Мереке ЖАМБЫЛОВҚА қоңырау шалған едік.

- Біз атқарушы емес, өкілді орган болғандықтан да ешқандай ақпарат тарата алмаймыз, - деп мәлімдеді М. Жамбылов. - 19 депутаттың 18-і «Нұр Отан» партиясының мүшесі екенін ғана айта аламын. Олар әр аптаның бейсенбі күндері қоғамдық қабылдау жүргізеді.

Сонымен, құрметті оқырмандар, екі маслихаттан түскен жауаптар осындай болды. Алға қарай депутаттарыңызбен тығыз қарым-қатынас орнатуларыңызға тілектеспін.

Сәния ТОЙКЕН

ІV шақырылған Атырау облыстық мәслихаты депутаттары тізімі