Браконьер балық инспекторы болып шықты

Облыстық прокуратураның баспасөз қызметі Махамбет аудандық балық инспекциясының қызметкеріне қатысты қылмыстық іс қозғау туралы баспасөз хабарламасын таратты.

Үстіміздегі жылдың 7 қазанында облыстық табиғат қорғау прокуратурасының қызметкерлері ІІД-мен және Жайық-Каспий балық шаруашылығы инспекциясымен бірге Исатай ауданына рейд жүргізу кезінде жүргізуші мен Махамбет аудандық балық шаруашылығы инспекциясының қызметкері отырған автокөлікті тоқтатты. Көлікті тексеру кезінде жалпы салмағы 50 келі болатын бекіре тұқымдас балық салынған 3 қапшық табылып, алынды.

Балық инспекторына қатысты ҚР ҚК-нің 290-бабы («Сирек кездесетiн және құрып кету қаупi төнген түрлерiмен заңсыз іс-әрекеттер») және 308-бабы («Билiктi не қызметтiк өкiлеттiктi асыра пайдалану») бойынша қылмыстық іс қозғалды, деп хабарланады баспасөз хабарламасында. Тергеу жүргізілуде.

Мұрат СҰЛТАНҒАЛИЕВ