2017 жылдың 1 шілдесiнен бастап Қазақстанда екі миллион зейнеткердің базалық зейнетақысы артады

2017 жылдың 1 шілдесiнен бастап базалық зейнетақыны жаңа тәртіппен тағайындау мәселесі қарастырылуда, деп хабарлады Еңбек және халықты әлеуметтiк қорғау министрi Тамара Дүйсенова. 

«2017 жылдың 1 шiлдесiнен бастап базалық зейнетақыны есептеудiң жаңа әдiстемесiне көшемiз. 2018 жылдың 1 қаңтарынан барлық қызметкерлерге жұмыс берушi тарапынан 5%-дық мiндеттi зейнетақы жарнасы төлене бастайды», - дедi Т.Дүйсенова ҚР Президентi жанындағы ОКҚ брифингi барысында. 

Оның айтуынша, еңбек өтiлi немесе зейнетақы жүйесiне қатысу уақыты 10 жылға дейiнгi азаматтарға ең төменгi күнкөрiс деңгейiнiң 50%-ы көлемiнде зейнетақы тағайындалатын болады. 

«20 жылдан астам өтiлi бар азамат 70%, ал 35 және одан артық уақыт еңбек өтiлi немесе зейнетақы жинақтау жүйесiне қатысып отырған азаматқа ең төменгi күнкөрiс деңгейiнiң 100% көлемiнде зейнетақы тағайындалады», - деп толықтырды өз ойын ол. 

Министр 2017 жылдың 1 қаңтарынан бастап ең төменгi күнкөрiс деңгейiн есептеу әдiстемесi өзгеретінін тiлге тиек еттi.

Дереккөз: Қазақстан жаңалықтары АА.